 Sport Mundik Etiopia-Utopia proiektura dirua biltzeko antolatutako gaualdi solidarioan, Imanol Lopez puntistaren eta Txema Olazabal golfariaren arteko abiadura desafioan, Jaitzubiko golfariak pilota 244 kilometro orduko abiaduran jarrita nagusitu zen.
HONDARRIBIA / ErredakzioaAtzo Jostaldi pilotalekuan Sport Mundi elkartearen aldeko gaualdi solidarioa jarraitu zuten ehunka lagunek, Txema Olazabal golfariaren eta Imanol Lopez puntistaren arteko desafioaz gozatu ahal izan zuten. Golf eta zestapunta piloten arteko abiadura desafioa Olazabalek irabazi bazuen ere, abantaila minimo batekin nagusitu zen. Izan ere, Sport Mundiko presidente eta golfari hondarribitarrak 244 kilometro orduko kolpea eman zuen hirugarren saialdian. Eta Lopezek 243 kilometro ordura jarri zuen pilota zestapuntaz. Txema Olazabal pozik azaldu zen desafioa egin izanagatik. "Desafioan parte-hartzea proposatu zidatenean, arraro ikusi nuen, baina proba egitea merezi zuela pentsatu eta egindako probetan arriskurik ez zegoela ikusi nuen". Nolanahi ere, desafio bitxi honen benetako irabazlea Etiopia izan dela nabarmendu du Jaitzubiako golfariak. "Sport Mundik Etiopia-Utopia proiektua aurrera eraman ahal izateko dirua bildu du, eta hori da garrantzitsuena".  Bestalde, Imanol Lopez zestapuntako abiadura marka historikotik urrun geratu zen atzo. Bere kolpe hoberenean 243 kilometro ordura jarri baitzuen pilota, eta 70. hamarkadan Jose Ramon Areitio puntista bizkaitarrak Rhode Island-eko Newport Jai-Alaian 302 kilometro orduko marka egin zuen. "Garaia haietan abiadura beste modu batean neurtzen zutelako, edo txuleta gehiago jaten zutelako izango da", esan du txantxetan Lopezek.
Baina desafioa ez zen atzo Jostaldin Lopezen hitzordu bakarra. Zestapunta partida erakustaldia jokatu baitzuten ere, Erkiaga-Lopez eta Egiguren-Hernandezen artean. Lagunarteko partida izateko erritmo bizia izan zuen partidak, eta 30-26 markagailuarekin bukatu zuten.
 |
RSS feed Comments